കുവൈറ്റ് സിറ്റി: താൽക്കാലിക ഗതാഗത ക്രമീകരണങ്ങളുടെ ഭാഗമായി കുവൈറ്റിലെ ഓത് മാൻ ബിൻ അഫാൻ സ്ട്രീറ്റ് റൗണ്ട്എബൗട്ട് എല്ലാ ദിശകളിലേക്കുമുള്ള വാഹന ഗതാഗതത്തിനായി പൂർണ്ണമായി അടച്ചതായി ജനറൽ ഡയറക്ടറേറ്റ് ഓഫ് ട്രാഫിക് അറിയിച്ചു.
ജൂൺ 26 വെള്ളിയാഴ്ച മുതൽ പ്രാബല്യത്തിൽ വന്ന ഈ ഗതാഗത നിയന്ത്രണം 2026 ജൂൺ 30 ചൊവ്വാഴ്ച വരെ തുടരുമെന്ന് അധികൃതർ വ്യക്തമാക്കി. ഈ ദിവസങ്ങളിൽ റൗണ്ട്എബൗട്ടിലേക്ക് എത്തുന്നതിന് മുൻപായുള്ള പ്രത്യേക യു-ടേണുകളിലൂടെയും കട്ടിംഗുകളിലൂടെയുമാണ് വാഹനങ്ങൾ തിരിച്ചുവിടുന്നത്. റോഡുകളിലെ വാഹനത്തിരക്ക് ലഘൂകരിക്കുന്നതിനും സുഗമമായ ഗതാഗതം ഉറപ്പാക്കുന്നതിനുമാണ് ഈ ബദൽ സംവിധാനം ഏർപ്പെടുത്തിയിരിക്കുന്നത്.
നിയന്ത്രണങ്ങൾ നിലനിൽക്കുന്ന സാഹചര്യത്തിൽ വാഹനമോടിക്കുന്നവർ താൽക്കാലിക റോഡ് മാറ്റങ്ങൾ കൃത്യമായി പാലിക്കണമെന്നും ട്രാഫിക് സൂചനകൾ ശ്രദ്ധിക്കണമെന്നും ട്രാഫിക് വിഭാഗം നിർദ്ദേശിച്ചു. യാത്രാ സുരക്ഷ ഉറപ്പാക്കുന്നതിനും ഗതാഗതക്കുരുക്ക് ഒഴിവാക്കുന്നതിനുമായി സംഭവസ്ഥലത്ത് വിന്യസിച്ചിരിക്കുന്ന ട്രാഫിക് ഉദ്യോഗസ്ഥരുമായി പൊതുജനങ്ങൾ പൂർണ്ണമായി സഹകരിക്കണമെന്നും അധികൃതർ ആവശ്യപ്പെട്ടു.
