കുവൈറ്റ് സിറ്റി : കുവൈത്തിൽ വേനൽച്ചൂട് ശക്തമാകുകയും എയർ കണ്ടീഷണറുകളുടെയും വൈദ്യുത ഉപകരണങ്ങളുടെയും ഉപയോഗം വർധിക്കുകയും ചെയ്യുന്ന സാഹചര്യത്തിൽ തീപിടിത്ത അപകടങ്ങൾ ഒഴിവാക്കാൻ പൊതുജനങ്ങൾ ജാഗ്രത പാലിക്കണമെന്ന് ജനറൽ ഫയർ ഫോഴ്സ് മുന്നറിയിപ്പ് നൽകി.സമൂഹത്തിന്റെ സുരക്ഷ ഉറപ്പാക്കാൻ പ്രതിരോധ നടപടികൾ പാലിക്കേണ്ടത് എല്ലാവരുടെയും ഉത്തരവാദിത്വമാണെന്ന് ജനറൽ ഫയർ ഫോഴ്സിന്റെ ഔദ്യോഗിക വക്താവും പബ്ലിക് റിലേഷൻസ് ആൻഡ് മീഡിയ ഡയറക്ടറുമായ ബ്രിഗേഡിയർ ജനറൽ മുഹമ്മദ് അൽ-ഘരീബ് വ്യക്തമാക്കി.വേനൽക്കാലത്ത് തീപിടിത്തങ്ങൾക്ക് പ്രധാന കാരണങ്ങളായി അമിത വൈദ്യുതി ലോഡ്, തകരാറുള്ള വയറിംഗുകൾ, വൈദ്യുത ഉപകരണങ്ങളുടെ തെറ്റായ ഉപയോഗം, ദീർഘസമയം ഉപകരണങ്ങൾ പ്രവർത്തിപ്പിക്കൽ, ജ്വലനശേഷിയുള്ള വസ്തുക്കളുടെ സുരക്ഷിതമല്ലാത്ത സംഭരണം എന്നിവയെ അദ്ദേഹം ചൂണ്ടിക്കാട്ടി.
തീപിടിത്ത സാധ്യത കുറയ്ക്കാൻ ഫയർ ഫോഴ്സ് നിർദേശിക്കുന്ന 7 പ്രധാന നടപടികൾ:
✅ വൈദ്യുത വയറിംഗുകൾക്ക് കൃത്യമായ ഇടവേളകളിൽ പരിശോധനയും അറ്റകുറ്റപ്പണിയും നടത്തുക.
✅ എയർ കണ്ടീഷണറുകളുടെ സുരക്ഷയും പ്രവർത്തനക്ഷമതയും ഉറപ്പാക്കുക.
✅ വൈദ്യുത സോക്കറ്റുകളിൽ അമിത ലോഡ് നൽകാതിരിക്കുക.
✅ തീപിടിക്കാൻ സാധ്യതയുള്ള വസ്തുക്കൾ ചൂട് ഉറവിടങ്ങളിൽ നിന്ന് അകറ്റി സൂക്ഷിക്കുക.
✅ സ്മോക്ക് ഡിറ്റക്ടറുകൾ സ്ഥാപിച്ച് ഇടയ്ക്കിടെ പരിശോധിക്കുക.
✅ അഗ്നിശമന ഉപകരണങ്ങൾ (Fire Extinguishers) ഒരുക്കി പ്രവർത്തനസജ്ജമാക്കി വയ്ക്കുക.
✅ കെട്ടിടങ്ങളിലും സ്ഥാപനങ്ങളിലും വ്യക്തമായ ഒഴിപ്പിക്കൽ (Evacuation) പദ്ധതി തയ്യാറാക്കുക.കൂടാതെ, കുട്ടികളെ അപകടസാധ്യതയുള്ള സ്ഥലങ്ങളിൽ മേൽനോട്ടമില്ലാതെ വിടരുതെന്നും, വൈദ്യുത ഉപകരണങ്ങളും ഗ്യാസ് സിലിണ്ടറുകളും ഉപയോഗിക്കുമ്പോൾ സുരക്ഷാ നിർദേശങ്ങൾ കർശനമായി പാലിക്കണമെന്നും, അപകടസാധ്യതകൾ ശ്രദ്ധയിൽപ്പെട്ടാൽ ബന്ധപ്പെട്ട അധികൃതരെ ഉടൻ അറിയിക്കണമെന്നും അഗ്നിശമന സേന അഭ്യർത്ഥിച്ചു.
