കുവൈത്ത്സിറ്റി: കുവൈത്തിൽ ഇന്ന് (ഞായറാഴ്ച) വിവിധ പ്രദേശങ്ങളിൽ ഇടിമിന്നലോടുകൂടിയ മഴയ്ക്ക് സാധ്യതയുണ്ടെന്ന് കാലാവസ്ഥാ വകുപ്പ് അറിയിച്ചു. രാജ്യത്ത് ഭാഗികമായി മേഘാവൃതമായ കാലാവസ്ഥയായിരിക്കുമെന്നും ചില സമയങ്ങളിൽ ശക്തമായ കാറ്റിനും തുറസ്സായ പ്രദേശങ്ങളിൽ പൊടിക്കാറ്റിനും സാധ്യതയുണ്ടെന്നും അധികൃതർ വ്യക്തമാക്കി.പകൽ സമയത്ത് നേരിയ ചൂടുള്ള കാലാവസ്ഥയായിരിക്കും അനുഭവപ്പെടുക. വടക്കുകിഴക്കൻ ദിശയിൽനിന്നും ദിശമാറിയും വീശുന്ന കാറ്റിന് മണിക്കൂറിൽ 15 മുതൽ 40 കിലോമീറ്റർ വരെ വേഗതയുണ്ടാകാം. ചില സമയങ്ങളിൽ കാറ്റ് ശക്തിപ്പെടാനും സാധ്യതയുണ്ട്.
രാത്രിയിൽ താപനില കുറഞ്ഞ് നേരിയ തണുപ്പ് അനുഭവപ്പെടും. കാറ്റിന്റെ ദിശ വടക്കുപടിഞ്ഞാറൻ ഭാഗത്തേക്ക് മാറാനും സാധ്യതയുണ്ട്. രാത്രിയിലും മണിക്കൂറിൽ 15 മുതൽ 40 കിലോമീറ്റർ വരെ വേഗതയിൽ കാറ്റ് വീശിയേക്കും.ഇന്ന് രാജ്യത്ത് കൂടിയ താപനില 30 ഡിഗ്രി സെൽഷ്യസും കുറഞ്ഞ താപനില 22 ഡിഗ്രി സെൽഷ്യസുമായിരിക്കുമെന്നാണ് പ്രവചനം. അന്തരീക്ഷത്തിലെ ഈർപ്പം 80 ശതമാനം വരെ ഉയരാനും സാധ്യതയുണ്ട്.
കടലിൽ പകൽ സമയത്ത് തിരമാലകൾക്ക് ഒന്ന് മുതൽ അഞ്ച് അടി വരെയും രാത്രിയിൽ ഒന്ന് മുതൽ നാല് അടി വരെയും ഉയരമുണ്ടാകാം. കടൽ പൊതുവെ ശാന്തമോ മിതമായ തിരമാലകളോടുകൂടിയതോ ആയിരിക്കുമെന്നും കാലാവസ്ഥാ വകുപ്പ് അറിയിച്ചു.മഴയ്ക്കും ഇടിമിന്നലിനും കാറ്റിനും സാധ്യതയുള്ളതിനാൽ വാഹനമോടിക്കുന്നവരും തുറസ്സായ സ്ഥലങ്ങളിൽ ജോലി ചെയ്യുന്നവരും ആവശ്യമായ മുൻകരുതലുകൾ സ്വീകരിക്കുന്നത് ഉചിതമാണ്.
