കുവൈത്ത് സിറ്റി, നവംബർ 20: കുവൈത്തിൽ പ്രമുഖ അന്താരാഷ്ട്ര ബ്രാൻഡുകളുടെ പേരിൽ വ്യാജ ഉൽപ്പന്നങ്ങൾ സൂക്ഷിച്ചിരുന്ന ഗോഡൗണിൽ വാണിജ്യ വ്യവസായ മന്ത്രാലയം നടത്തിയ റെയ്ഡിൽ 40,870 ഉൽപ്പന്നങ്ങൾ പിടിച്ചെടുത്തു. താമസത്തിനും നിക്ഷേപത്തിനുമായി ഉപയോഗിക്കുന്ന ഒരു കെട്ടിടത്തിനുള്ളിൽ പ്രവർത്തിച്ചിരുന്ന ഗോഡൗണിലാണ് പരിശോധന നടത്തിയത്.വാണിജ്യ നിയന്ത്രണ, ഉപഭോക്തൃ സംരക്ഷണ വിഭാഗത്തിലെ ഉദ്യോഗസ്ഥർ നടത്തിയ നിരീക്ഷണത്തിന്റെയും അന്വേഷണത്തിന്റെയും അടിസ്ഥാനത്തിലായിരുന്നു റെയ്ഡ്. ഗോഡൗണിൽ അന്താരാഷ്ട്ര കമ്പനികളുടെ വ്യാപാരമുദ്രകൾ പതിച്ച വൻതോതിലുള്ള വ്യാജ ഉൽപ്പന്നങ്ങൾ സൂക്ഷിച്ചിരുന്നതായി പരിശോധനയിൽ കണ്ടെത്തി.
വ്യാപാരമുദ്രകളുടെ സംരക്ഷണവുമായി ബന്ധപ്പെട്ട 2015ലെ 13-ാം നമ്പർ നിയമവും ഗൾഫ് സഹകരണ കൗൺസിൽ രാജ്യങ്ങളിൽ വാണിജ്യ തട്ടിപ്പുകൾ തടയുന്നതിനുള്ള ഏകീകൃത നിയമവുമായി ബന്ധപ്പെട്ട 2019ലെ 20-ാം നമ്പർ നിയമവും ലംഘിച്ചതായി മന്ത്രാലയം വ്യക്തമാക്കി.പരിശോധനയിൽ കണ്ടെത്തിയ മുഴുവൻ വ്യാജ ഉൽപ്പന്നങ്ങളും അധികൃതർ പിടിച്ചെടുത്തു. നിയമലംഘനം രേഖപ്പെടുത്തിയതിനു പിന്നാലെ ഗോഡൗൺ ഉടൻ അടച്ചുപൂട്ടുകയും ചെയ്തു.
സംഭവത്തിൽ ഉത്തരവാദികളായവർക്കെതിരെ നിയമനടപടികൾ ആരംഭിച്ചതായും വാണിജ്യ വ്യവസായ മന്ത്രാലയം അറിയിച്ചു.വ്യാജ ബ്രാൻഡുകളുടെ പേരിൽ ഉൽപ്പന്നങ്ങൾ വിപണിയിലെത്തിക്കുന്നത് തടയുന്നതിനും ഉപഭോക്താക്കളുടെ അവകാശങ്ങൾ സംരക്ഷിക്കുന്നതിനുമുള്ള നടപടികളുടെ ഭാഗമായാണ് റെയ്ഡ് നടത്തിയത്.അന്താരാഷ്ട്ര വ്യാപാരമുദ്രകൾ ദുരുപയോഗം ചെയ്ത് വ്യാജ ഉൽപ്പന്നങ്ങൾ സൂക്ഷിക്കുകയും വിൽപ്പന നടത്തുകയും ചെയ്യുന്ന സ്ഥാപനങ്ങൾക്കെതിരെ നിയമപ്രകാരമുള്ള നടപടികൾ സ്വീകരിക്കുമെന്ന് അധികൃതർ വ്യക്തമാക്കി.



