കുവൈറ്റ് സിറ്റി : രാജ്യത്തെ ചില പ്രദേശങ്ങളില്‍ നിലവിലുള്ള ലോക്ഡൌണ്‍ ഒഴിവാക്കുന്നതുമായി ബന്ധപ്പെട്ട് സർക്കാർ വ്യാഴാഴ്ച തീരുമാനമെടുക്കാന്‍ സാധ്യത. ജൂണ്‍ 20 നു തീരേണ്ട ആദ്യഘട്ടം താല്‍ക്കാലികമായി നീട്ടിയിരുന്നു. സമീപ ദിവസങ്ങളിൽ പുതിയ കോവിഡ് റിപ്പോർട്ടുകൾ കുറഞ്ഞ മഹബൂലയിൽ ലോക്ഡൌണ്‍ ഒഴിവാക്കുന്നത് പരിഗണനയിലുണ്ടെന്നാണ് റിപ്പോർട്ട്. അതോടപ്പം ഫര്‍വാനിയയിലും ലോക്ഡൌണ്‍ ഒഴിവാക്കി അബ്ബാസിയയില്‍ മാത്രമായി ലോക് ഡൌണ്‍ പരിമിതപ്പെടുത്താനും തീരുമാനങ്ങള്‍ ഉണ്ടെന്നാണ് സൂചന. ഇതുവരെ ഇതുസംബന്ധിച്ച് ഒരു തീരുമാനവും എടുത്തിട്ടില്ലെന്നും വ്യഴാഴ്ചത്തെ യോഗത്തിലാണ് തീരുമാനമെടുക്കുകയെന്നും ഉന്നതവൃത്തങ്ങൾ ഉദ്ധരിച്ച് പ്രാദേശിക പത്രങ്ങള്‍ റിപ്പോര്‍ട്ട് ചെയ്തു. രണ്ടാം ഘട്ടത്തിന്‍റെ ഭാഗമായി കർഫ്യൂ സമയത്തിലും മാറ്റങ്ങള്‍ വരുത്തുവാന്‍ സാധ്യതയുണ്ട്. ഭാഗിക കർഫ്യൂ രാത്രി 9 മുതൽ പുലർച്ചെ 5 വരെ കുറയ്ക്കുകയും സർക്കാർ സ്ഥാപനങ്ങളും മന്ത്രാലയങ്ങളും 30% തൊഴിലാളികളിൽ ജോലി പുനരാരംഭിക്കുവാന്‍ അനുവദിക്കുകയും ചെയ്യും. സര്‍ക്കാര്‍ സ്ഥാപനങ്ങളില്‍ പ്രീ ബൂക്കിംഗ് വഴി സന്ദർശകരെ അനുവദിക്കും. കോവിഡ് പ്രതിരോധ ഭാഗമായുള്ള നിയന്ത്രണങ്ങളിൽ ഘട്ടംഘട്ടമായി ഇളവ് അനുവദിച്ച് സാധാരണ ജീവിതത്തിലേക്ക് നാടിനെ തിരിച്ചുകൊണ്ടുവരാനുള്ള തീരുമാനത്തിലാണ് അധികൃതർ. സെപ്റ്റംബർ അല്ലെങ്കിൽ ഒക്ടോബറിൽ പകർച്ചവ്യാധിയുടെ രണ്ടാം ഘട്ടം വരാന്‍ സാധ്യതയുള്ളതിനാല്‍ ആരോഗ്യ വകുപ്പിന്‍റെ കര്‍ശനമായ മാര്‍ഗ്ഗനിര്‍ദ്ദേശങ്ങള്‍ തുടരുമെന്നാണ് സൂചന.
Lorem ipsum dolor sit amet, consectetur adipisicing elit. Velit omnis animi et iure laudantium vitae, praesentium optio, sapiente distinctio illo?