കുവൈറ്റ് സിറ്റി: രാജ്യത്ത് ഡ്രോണുകളുടെ പ്രവർത്തനത്തിനും ആകാശത്തുനിന്നുള്ള ഫോട്ടോഗ്രാഫിക്കും ഏർപ്പെടുത്തിയിരിക്കുന്ന കർശന നിരോധനം അടുത്ത ഉത്തരവ് ഉണ്ടാകുന്നത് വരെ തുടരുമെന്ന് കുവൈറ്റ് ആഭ്യന്തര മന്ത്രാലയം ഒരിക്കൽ കൂടി വ്യക്തമാക്കി. ഈ തീരുമാനവുമായി ബന്ധപ്പെട്ട നിർദ്ദേശങ്ങൾ എല്ലാവരും പൂർണ്ണമായും പാലിക്കണമെന്ന് മന്ത്രാലയം ആവശ്യപ്പെട്ടു.
നിർദ്ദേശങ്ങൾ ലംഘിക്കുന്നവർക്കെതിരെ രാജ്യത്തെ നിലവിലുള്ള നിയമങ്ങളുടെയും ചട്ടങ്ങളുടെയും അടിസ്ഥാനത്തിൽ കർശനമായ നിയമനടപടികൾ സ്വീകരിക്കുമെന്ന് അധികൃതർ മുന്നറിയിപ്പ് നൽകി. രാജ്യത്തിന്റെയും പൗരന്മാരുടെയും താമസക്കാരുടെയും സുരക്ഷയും സമാധാനവും ഉറപ്പാക്കുന്നതിന്റെ ഭാഗമായാണ് ഈ നടപടികളെന്നും, ഇതിനോട് എല്ലാ പൗരന്മാരും താമസക്കാരും സഹകരിക്കണമെന്നും ആഭ്യന്തര മന്ത്രാലയം അഭ്യർത്ഥിച്ചു.
