ഇന്ത്യൻ വിപണിയിലെ ഏറ്റവും ജനപ്രിയവും സൗകര്യപ്രദവുമായ ഒരു ഫാമിലി സ്കൂട്ടറാണ് ടിവിഎസ് ജൂപ്പിറ്റർ 125. മികച്ച പെർഫോമൻസ്, ആകർഷകമായ ഫീച്ചറുകൾ, വലിയ സ്റ്റോറേജ് സ്പേസ് എന്നിവയാണ് ഇതിനെ സവിശേഷമാക്കുന്നത്. രണ്ട് പുതിയ കളർ ഓപ്ഷനുകൾ ചേർത്ത് ടിവിഎസ് ജൂപ്പിറ്റർ 125 ലൈനപ്പ് പരിഷ്ക്കരിച്ചിരിക്കുകയാണ് കമ്പനി ഇപ്പോൾ. പുതുക്കിയ ടിവിഎസ് ജൂപ്പിറ്റർ 125ന് ഇപ്പോൾ ഐവറി എലൈറ്റ് ഗ്രീൻ, ഐവറി മാറ്റ് കോപ്പർ ബ്രോൺസ് എന്നീ രണ്ട് ഷേഡുകൾ കൂടെ ലഭിക്കുന്നു.
സ്കൂട്ടറിന് പുതുമയും കൂടുതൽ പ്രീമിയം ലുക്കും തോന്നിപ്പിക്കുന്ന കളറുകളാണ് ഇവ. പുതിയ നിറങ്ങൾ ടിവിഎസ് ജൂപ്പിറ്റർ 125ന്റെ DT SXC വേരിയന്റിൽ മാത്രമായി ലഭ്യമാകൂ. രാജ്യത്തെ ഏറ്റവും കൂടുതൽ വിറ്റഴിക്കപ്പെടുന്ന സ്കൂട്ടറുകളിൽ ഒന്നാണ് ടിവിഎസ് ജൂപ്പിറ്റർ 125. ഹോണ്ട ആക്ടിവ 125, സുസുക്കി ആക്സസ് 125, ഹീറോ ഡെസ്റ്റിനി 125 എന്നിവയാണ് ഇതിന്റെ പ്രധാന എതിരാളികൾ.
പുതിയ ഡ്യുവൽ-ടോൺ കളർ ഓപ്ഷനുകൾ നൽകിക്കൊണ്ടുള്ള കോസ്മെറ്റിക് അപ്ഡേറ്റിനൊപ്പം, തിരഞ്ഞെടുത്ത വേരിയന്റുകളുടെ വിലയും കമ്പനി 1,000 രൂപ വരെ വർധിപ്പിച്ചിട്ടുണ്ട്. പുതുക്കിയ വില ഉൾപ്പെടെയുള്ള വിശദാംശങ്ങൾ പരിശോധിക്കാം.
ടിവിഎസ് ജൂപ്പിറ്റർ 125 ലെ ഏറ്റവും വലിയ അപ്ഡേറ്റ് രണ്ട് പുതിയ ഡ്യുവൽ-ടോൺ കളർ സ്കീമുകൾ ചേർത്തതാണ്. അതേസമയം, ഐവറി മാറ്റ് കോപ്പർ ബ്രോൺസ് ഷേഡിൽ കൂടുതൽ മനോഹരമാക്കാനായി ഐവറി പാനലുകളുമായി സംയോജിപ്പിച്ച വെങ്കല ഹൈലൈറ്റുകൾ ഉപയോഗിക്കുന്നു. ടിവിഎസ് ജൂപ്പിറ്റർ 125 ലെ പുതിയ പെയിന്റ് സ്കീമുകളിൽ ഫ്ലോർബോർഡിനും സീറ്റ് ഏരിയയ്ക്കും ചുറ്റും ബീജ്, ബ്രൗൺ ഘടകങ്ങൾ ഉൾപ്പെടുത്തിയിട്ടുണ്ട്. ഇത് പ്രീമിയം സ്റ്റൈലിങിന് കൂടുതൽ ആക്കം കൂട്ടുന്നു.
ഇതോടെ ടിവിഎസ് ജൂപ്പിറ്റർ 125 ആകെ പതിനൊന്ന് കളർ ഓപ്ഷനുകളിൽ ലഭ്യമാകും. എന്നാൽ ചില കളർ ഓപ്ഷനുകൾ ചില വകഭേദങ്ങളിൽ മാത്രമായി പരിമിതപ്പെടുത്തിയിട്ടുണ്ട്. ടിവിഎസ് ജൂപ്പിറ്റർ 125നെ കൂടുതൽ സ്റ്റൈലിഷ് ആക്കാനും അതോടൊപ്പം ഫാമിലി സ്കൂട്ടറായി നിലനിർത്താനും ടിവിഎസ് ശ്രമിക്കുന്നു.
