കുവൈത്ത് സിറ്റി: ഗൾഫ് റെയിൽവേ പദ്ധതിയുടെ രൂപകൽപ്പന ഘട്ടം അവസാന ഘട്ടത്തിലാണെന്നും ഇതിന്റെ വലിയൊരു ഭാഗം ഇതിനകം പൂർത്തിയായിട്ടുണ്ടെന്നും പബ്ലിക് വർക്ക്സ് മന്ത്രാലയത്തിലെ കൺസ്ട്രക്ഷൻ ആൻഡ് മേജർ പ്രോജക്ട്സ് ജനറൽ ഡിപ്പാർട്ട്മെന്റ് ഡയറക്ടർ ജനറൽ എൻജിനീയർ ദുഹ അൽ-ധാഹി വ്യക്തമാക്കി. തിങ്കളാഴ്ച ആരംഭിച്ച് വ്യാഴാഴ്ച വരെ നീണ്ടുനിൽക്കുന്ന 2026 ലെ കുവൈത്ത് പ്രോജക്ട് മാനേജ്‌മെന്റ് കോൺഫറൻസിന്റെ ഉദ്ഘാടന ചടങ്ങിൽ പബ്ലിക് വർക്ക്സ് മന്ത്രി ഡോ. നൂറ അൽ-മഷാന് വേണ്ടി സംസാരിക്കുകയായിരുന്നു അവർ. കുവൈത്തിനെയും റിയാദിനെയും ബന്ധിപ്പിക്കുന്ന റെയിൽവേ പദ്ധതി നിലവിൽ ജി.സി.സി രാജ്യങ്ങളുടെ പൂർണ്ണ ഏകോപനത്തോടെ കരാർ ക്ഷണിക്കുന്ന ഘട്ടത്തിലാണെന്നും അവർ അറിയിച്ചു.
രാജ്യത്തിന്റെ വികസന ചരിത്രത്തിലെ നിർണായക ഘട്ടത്തിലൂടെയാണ് കുവൈത്ത് കടന്നുപോകുന്നതെന്നും ‘കുവൈത്ത് 2035’ കാഴ്ചപ്പാട് ലക്ഷ്യങ്ങൾ കൈവരിക്കുന്നതിനായി കൂട്ടായ ശ്രമങ്ങൾ വേഗത്തിലാക്കിയിട്ടുണ്ടെന്നും അൽ-ധാഹി പറഞ്ഞു. വിമാനത്താവള പദ്ധതിയുടെ പ്രവർത്തനങ്ങൾ സുഗമമായി പുരോഗമിക്കുകയാണെന്നും കൃത്യസമയത്ത് പൂർത്തിയാക്കുന്നത് ഉറപ്പാക്കാൻ മന്ത്രാലയം ദിവസേന നിരീക്ഷണം നടത്തിവരുന്നുണ്ടെന്നും അവർ വ്യക്തമാക്കി. ചൈനയുമായി ഒപ്പുവെച്ച ഉഭയകക്ഷി കരാറിന്റെ അടിസ്ഥാനത്തിലുള്ള മുബാറക് അൽ-കബീർ തുറമുഖ പദ്ധതിയും നിശ്ചയിച്ച സമയക്രമമനുസരിച്ച് നടപ്പിലാക്കിവരുന്നുണ്ട്.
വലിയ പദ്ധതികളുടെ വിജയം കേവലം സമയബന്ധിതമായ പൂർത്തീകരണത്തിലോ ബജറ്റ് പരിധിക്കുള്ളിൽ ഒതുങ്ങുന്നതിലോ മാത്രമല്ല അടങ്ങിയിരിക്കുന്നതെന്നും, അത് നവീന സാങ്കേതിക വിദ്യകളും ആർട്ടിഫിഷ്യൽ ഇന്റലിജൻസും (AI) സമന്വയിപ്പിക്കുന്നതിനെ ആശ്രയിച്ചാണിരിക്കുന്നതെന്നും അവർ കൂട്ടിച്ചേർത്തു. സുസ്ഥിര വികസനവും ഉയർന്ന ഭരണാധികാര മാനദണ്ഡങ്ങളും നടപ്പിലാക്കുന്നതിന് മന്ത്രാലയം മുൻഗണന നൽകുന്നുണ്ടെന്നും അവർ ഓർമ്മിപ്പിച്ചു.
