കുവൈറ്റ് സിറ്റി: പൊതുജനാരോഗ്യം മുൻനിർത്തി കുവൈറ്റിലെ ഭക്ഷ്യസ്ഥാപനങ്ങളിൽ അധികൃതർ നടത്തിയ കർശന പരിശോധനയിൽ വ്യാപക ക്രമക്കേടുകൾ കണ്ടെത്തി. പബ്ലിക് അതോറിറ്റി ഫോർ ഫുഡ് ആൻഡ് ന്യൂട്രീഷന്റെ നേതൃത്വത്തിൽ ജഹ്റ ഗവർണറേറ്റിലും അനുബന്ധ പ്രദേശങ്ങളിലും നടത്തിയ പതിവ് ഫീൽഡ് പരിശോധനകളിലാണ് നിയമലംഘനങ്ങൾ പിടികൂടിയത്.
പരിശോധനയിൽ വിവിധ ഭക്ഷ്യവിൽപ്പനശാലകളിലായി ആകെ 28 നിയമലംഘനങ്ങളാണ് അധികൃതർ രേഖപ്പെടുത്തിയത്.മനുഷ്യോപയോഗത്തിന് യോഗ്യമല്ലാത്ത രീതിയിൽ പഴകിയ മാംസവും പച്ചക്കറികളും ഉപയോഗിച്ചതിനും, ഗുണനിലവാരമില്ലാത്തതും വ്യാജവുമായ ഭക്ഷ്യവസ്തുക്കൾ വിൽപ്പനയ്ക്ക് വെച്ചതിനുമാണ് മൂന്ന് പ്രമുഖ സ്ഥാപനങ്ങൾക്കെതിരെ ഉടനടി നടപടിയുണ്ടായത്.
നിയമലംഘനം കണ്ടെത്തിയതിനെ തുടർന്ന് ഈ മൂന്ന് സ്ഥാപനങ്ങളും അധികൃതർ അടിയന്തരമായി പൂട്ടിപ്പൂട്ടിക്കുകയും ഭക്ഷ്യസുരക്ഷാ നിയമപ്രകാരമുള്ള നിയമനടപടികൾ സ്വീകരിക്കുകയും ചെയ്തു. പൊതുജനങ്ങളുടെ ആരോഗ്യം സംരക്ഷിക്കുന്നതിനും എല്ലാ ഭക്ഷ്യസ്ഥാപനങ്ങളും നിശ്ചിത മാനദണ്ഡങ്ങൾ പാലിക്കുന്നുണ്ടെന്ന് ഉറപ്പാക്കുന്നതിനുമായി ഗവർണറേറ്റിലുടനീളം വരും ദിവസങ്ങളിലും പരിശോധനകൾ കൂടുതൽ ഊർജ്ജിതമായി തുടരുമെന്ന് അതോറിറ്റി വ്യക്തമാക്കി.
