കുവൈറ്റ് സിറ്റി : വിദേശ രാജ്യങ്ങളിൽ നിന്ന് കേരളത്തിലേക്ക് മടങ്ങി വരുന്ന പ്രവാസികൾക്ക് കോവിഡ് ടെസ്റ്റ് നിർബന്ധമാക്കിയ കേരള സർക്കാർ നടപടി ലക്ഷക്കണക്കിന്‌ പ്രവാസികളെ വീണ്ടും ആശങ്കയുടെ നിഴലിലാക്കിയിരിക്കുകയാണെന്നും അതിഥി തൊഴിലാളികൾക്ക് നൽകുന്ന പരിഗണന പോലും വിദേശത്ത് നിന്നും വരുന്നവർക്ക് നൽകാനാവില്ലെന്ന സർക്കാർ നിലപാട് പ്രവാസി സമൂഹത്തോടുള്ള വെല്ലുവിളിയാണെന്നും ബേപ്പൂർ മണ്ഡലം കെ.എം.സി.സി ഗ്ലോബൽ കമ്മിറ്റി. കോവിഡ് വ്യാപന ആശങ്കയും ജോലിയും വരുമാനവുമില്ലാതെയായതും പ്രവാസികളെ മാനസികമായി ഏറെ തളർത്തിയിരിക്കുകയാണ്‌. ദിനേന മലയാളികടക്കമുള്ള നിരവധി പേരാണ്‌ വിവിധ രാജ്യങ്ങളിൽ കോവിഡ് ബാധിച്ച് മരിച്ചു കൊണ്ടിരിക്കുന്നത്. ഹൃദയാഘാതം മൂലമുള്ള മരണങ്ങളും വർധിച്ചു വരുന്നു. ഈയൊരു സാഹചര്യത്തിലാണ്‌ പ്രവസികളിൽ ചിലർ നാടണയാൻ എംബസിയിലും നോർക്കയിലുമെല്ലാം രജിസ്റ്റർ ചെയ്ത് കാത്തിരിക്കുന്നത്. എന്നാൽ കോവിഡ് ടെസ്റ്റ് നിർബന്ധമാക്കിയതോടെ ഇവരുടെ യാത്ര അനിശ്ചിതത്തിലായിരിക്കുകയാണ്‌. കേരള സർക്കാറിന്റെ വികലമായ കാഴ്ചപ്പാടാണ്‌ ഇത്തരമൊരു നിയമം പ്രവാസികളിൽ അടിച്ചേൽപ്പിക്കാൻ കാരണമായത്. ദൈനംദിനം നിലപാടുകൾ മാറ്റി പ്രവാസികളെ മാനസികമായി കൂടുതൽ തളർത്തുന്ന സമീപനമാണ്‌ സർക്കാർ സ്വീകരിച്ചു വരുന്നത്. വിദേശ രാജ്യങ്ങളി കോവിഡ് ടെസ്റ്റ് നടത്തുന്നതിലെ പ്രായോഗികതയും അതിന്റെ ചെലവ് സാധാരണക്കാരായ പ്രവാസികൾക്ക് വഹിക്കാനാവുമോയെന്നൊന്നും ചിന്തിക്കാതെ പ്രവാസികളുടെ മടക്കയാത്രക്ക് മുടക്കം വരുത്തുകയെന്ന ലക്ഷ്യത്തോടെയാണ്‌ സർക്കാർ പുതിയ തീരുമാനങ്ങൾ കൈകൊണ്ടിരിക്കുന്നത്.
മാസങ്ങളായി ജോലി ഇല്ലാതെ പ്രയാസം അനുഭവിക്കുന്ന പ്രവാസികൾ പലരിൽ നിന്നുമായി ടിക്കറ്റിനുള്ള പണം വരെ കണ്ടെത്തിയാണ് തന്റെ ജന്മനാട്ടിലേക്ക് വരാൻ ശ്രമിക്കുക്കുന്നത്. അതിനു തുരങ്കം വെക്കുന്ന ഈ നടപടിയിൽ നിന്ന് സർക്കാർ പിൻമാറണമെന്നും, ഹോം ക്വാറന്റൈനുമായി ബന്ധപ്പെട്ട് പ്രശ്നങ്ങൾ നേരിടുന്ന നിസ്സഹായരായ പ്രവാസികൾക്ക് സർക്കാർ ബദൽ സംവിധാനം കണ്ടെത്തണമെന്നും ഗ്ലോബൽ കെ.എം.സി.സി ബേപ്പൂർ മണ്ഡലം കമ്മിറ്റി പ്രമേയത്തിലൂടെ ആവശ്യപ്പെട്ടു. യോഗത്തിൽ പ്രസിഡന്റ് അഷ്‌റഫ് വേങ്ങാട്ട് അധ്യക്ഷത വഹിച്ചു. ഷാഹുൽ ബേപ്പൂർ, അഷ്‌റഫ് നല്ലളം, ഷാനവാസ് സി.പി, അയ്യൂബ് കല്ലട, സലീം എം.എൽ.സി, റാഷിദ് തങ്ങൾ, അക്‌ബർ വേങ്ങാട്ട്, പി.ടി സലാം, സിദ്ദീഖ് മുണ്ടോളി, സൈനുൽ ആബിദീൻ, മുസ്തഫ നല്ലളം സംസാരിച്ചു. ജനറൽ സെക്രട്ടറി സിദ്ദീഖ് പാണ്ടികശാല സ്വാഗതവും ട്രഷറർ നാസർ മുല്ലക്കൽ നന്ദിയും പറഞ്ഞു.
Lorem ipsum dolor sit amet, consectetur adipisicing elit. Velit omnis animi et iure laudantium vitae, praesentium optio, sapiente distinctio illo?